07.11.2017-ci il tarixdə F.Köçərli adına Respublika Dövlət Uşaq Kitabxanasının təşkil etdiyi Kitab Karvanı Neftçala rayon Mərkəzi Kitabxanasına səfər etdi. Qonaqlarımız F.Köçərli adına Respublika Dövlət Uşaq Kitabxanasının direktoru Şəhla Qəmbərova, direktor müavini Zahirə Dadaşova, Oxuculara xidmət şöbəsinin müdiri Könül Niftiyeva, uşaq yazıçıları Reyhan Yusifqızı, Aygün Bünyadzadə və Sevinc Nuruqızı idi. Həmçinin tədbirdə Neftçala şəhər 1 və 5 saylı orta məktəblərinin şagirdləri, V.Həmidov adına 3 saylı uşaq bağçası, körpələr evinin balaca fidanları iştirak edirdilər. Kitab karvanı bir-birindən maraqlı və bütün elm sahələrini əhatə edən çoxlu sayda kitabla gəlmişdi. Tədbiri giriş sözü ilə Neftçala rayon MKS-in direktoru G.Qasımova açaraq qonaqları salamladı və bu görüşdən bütün iştirakçıların çox məmnun olduğunu bildirdi. Sonra çıxış edən Şəhla xanım Kitab karvanlarının artıq 6 ildir davam etdiyini söylədi. Uşaq yazıçılarının bir-birindən maraqlı çıxışları azyaşlı oxucuların çox xoşuna gəldi. Qonaqların verdiyi suallara fəal cavab verən uşaqlara kitablar hədiyyə edildi.