Salyan Rayon Mədəniyyət Mərkəzi, 2 saylı Salyan şəhər klubu və Kürqaraqaşlı kənd Diyarşünaslıq Evinin təşkilatçılığı ilə "Nizami Gəncəvi İli"nə həsr olunan mədəniyyət nümayəndələrinin əl işlərindən ibarət dekorativ-tətbiqi sənət sərgisi keçirilib. Açılış mərasimində çıxış edən natiqlər dahi mütəffəkir, filosof, şair Nizami Gəncəvinin yaradıcılığı haqqında söz açıblar. Qeyd olunub ki, dekorativ-tətbiqi sənət sərgisi Salyan Rayon Mədəniyyət Mərkəzinin başlatdığı silsilə tədbirlərin yekunudur. Sərgidə 2 saylı şəhər klubunun mədəni-kütləvi tədbirlər üzrə təşkilatçısı Pərvanə Rzayevanın, Kürqaraqaşlı kənd Diyarşünaslıq Evinin "Bacarıqlı əllər" dərnəyinin və onun rəhbəri Aytən Vəliyevanın, Marışlı kənd Folklor Evinin metodisti Südabə Baloğlanlının, Ərəbqardaşbəyli kənd klubunun "Bacarıqlı uşaqlar" dərnəyinin, Beşdəli kənd klubunun mədəni-kütləvi tədbirlər üzrə təşkilatçısı Nərgiz Bağırovanın, Sarvan kənd Folklor Evinin rəhbəri İnqilab Abdullayevin, "Murad" Əlillər İctimai Birliyinin üzvlərinin əl işləri nümayiş olunub. Sərgi çərçivəsində mədəniyyət nümayəndələri Nizami Gəncəvinin qəzəllərini səsləndirib, şeirlərinə bəstələnmiş mahnılar ifa ediblər. Sonra tamaşaçılara musiqili kompozisiyalar təqdim olunub. Qeyd edək ki, dekorativ-tətbiqi sənət sərgisində satış da təşkil olunub. Sərgi şəhər sakinləri və qonaqlar tərəfindən maraqla qarşılanıb.