Biləsuvar Rayon İcra Hakimiyyətinin, Şirvan-Salyan Regional Mədəniyyət İdarəsinin və İctimai TV-nin birgə təşkilatçılığı ilə Heydər Əliyev Mərkəzində "Vətəndaş A" serialının nümayişinə başlanılıb. Filmi rayon ictimaiyyəti ilə yanaşı Biləsuvar Rayon İcra Hakimiyyətinin başçısı Faiq Qürbətov, Şirvan-Salyan Regional Mədəniyyət İdarəsinin rəisi Şahin Şahbazov, filmin baş prodüseri Sevinc Əliyeva, baş rolların ifaçıları Xalq artisti Qurban İsmayılov, aktrisalar Günəş Mehdizadə, Zəhra Əlisoy, aktyor Eltəkin Xan və ictimaiyyət izləyib.

 

Filmin yaradıcı heyəti əvvəlcə Salyan Dövlət Rəsm Qalereyası tərəfindən Heydər Əliyev Mərkəzində sərgilənən “Caz rəsmlərdə” adlı yaradıcılıq sərgisinə baxıblar.

 

Nümayişdən əvvəl çıxış edən prodüser Sevinc Əliyeva, baş rolların ifaçıları Qurban İsmayılov və Günəş Mehdizadə filmin vətəndaş kimliyini, bu kimliyin bir cəmiyyətin timsalında təşəkkül prosesini və təhsilin vətəndaş kimliyinin formalaşmasındakı həlledici əhəmiyyətinin bir daha tamaşaçıya çatdırılmasından bəhs etdiyini bildiriblər. Tədbirdə çıxış edən Biləsuvar Rayon İcra Hakimiyyətinin başçısı Faiq Qürbətov filmin yaradıcı heyətinə uğurlar arzulayıb.

 

Qeyd edək ki, serialın bütün hissələrinin Heydər Əliyev Mərkəzində nümayiş olunaraq ilin sonunadək yekunlaşdırılması nəzərdə tutulub. Sonra film nümayişi təqdim edilib. Ssenari müəllifi Asiman Ağa Rövşən, rejissoru Elvin Rüstəmzadə olan filmin ideyası Cəfər Cabbarlının "Almaz" pyesindən götürülüb.

 

Filmdən sonra Biləsuvar rayon Uşaq İncəsənət Məktəbinin yaradıcı kollektivinin ifası dinlənilib.