Salyan rayon Mədəniyyət Mərkəzində Azərbaycan kinosunun 120 illik yubileyinə həsr olunan “Milli kinomuz - 120” adlı tədbir keçirildi. Tədbiri giriş sözü ilə açan Mərkəzin direktoru Lətif Zərbəliyev Milli Kinomuz haqqında qısa xatirələrini bölüşüb. Tədbirin təşkilatçısı Azərbaycan Dövlət Mədəniyyət və İncəsənət Universitetinin məzunu, gənc rejissor Kürçaylı Məmmədov çıxış edərək Azərbaycan kinosunun tarixinə toxunub, müxtəlif filmlərin çəkiliş proseslərində baş verən maraqlı məlumat və faktları diqqətə çatdırıb, hazırladığı video çarxları təqdim edib. Sonra uzun müddət mədəniyyət sahəsində çalışan Əlizadə Əliyev və Əməkdar artist, Prezident mükafatçısı, Salyan Dövlət Kukla Teatrının baş rejissoru Rafiq Mirzə və başqaları çıxış edərək Milli Kinomuzun tarixi nailiyyətlərindən və bu günündən söhbət açıblar. Tədbir boyu səsləndirilən müxtəlif film musiqiləri iştirakçılarda xoş ovqat yaradıb. Diqqətə çatdırılıb ki, cənab prezident İlham Əliyevin Xalq artisti, görkəmli aktyor Həsən Məmmədovun 80 illik yubileyinin qeyd olunması barədə sərəncamı bir daha dövlətin Azərbaycan kino sənətinə diqqəti və qayğısıdır. Qeyd olundu ki, Mədəniyyət Mərkəzi həmyerlimiz Həsən Məmmədovun 80 illik yubileyinə xüsusi hazırlıq işləri görür. Tədbirdə mədəniyyət işçiləri ilə bərabər kino həvəskarları da iştirak edib.